تلقین اذکار
تلقین کا دستور
مرید شیخ کے حکم سے تین دن روزہ رکھے، اگر روزہ طے ہو، یعنی روزانہ افطار نہ کرے تو بہترہے، ہروقت باوضو ر ہے۔ اور ہمیشہ ذکر کرتا رہے۔ اگرخلوت میسر نہ ہو تو آہستہ آہستہ ذکر کرے، اور عوام سے اختلاط نہ کرے، بہتر تو یہ ہےکہ تین دن خلوت سے باہر نہ نکلے۔ بات بہت کم کرے اور افطار کے وقت کھانا کم کھائے تاکہ بیدار رہے، اور ذکر کرے۔جب تین دن گذرجائیں توشیخ کے حکم سے غسل کرے۔ دین اسلام میں داخل ہوتے وقت غسل کے بعد کلمہ کی تلقین کی جاتی ہے۔ اسلام مجازی کے لیے غسل شرط ہے، تواسلام حقیقی کےلیے اولیٰ ہے، جس وقت غسل کے لیے بدن پرپانی ڈالےتو کہے اے خدا! اپنے جسم کی نجاست پانی سے پاک کرتا ہوں تو میرے دل کو اپنی نظر عنایت سے منور کردے، غسل کے بعد شیخ کی خدمت میں قبلہ رو بیٹھے، اور شیخ جو احکام مرید کے حسب حال ہوں صادر فرما کر تلقین کرے۔ مرید شیخ کے سامنے دو زانو بیٹھے اورہاتھ زانو پر رکھے ،اور دل کو تمام خیالات سےیکسو کر کے شیخ کے دل کو اپنی طرف اور اپنے چہرے کو اس کے مقابل رکھ کے نیازمندی سے متوجہ ہو۔شیخ تین بار درود کی تلقین کرے اور ایک بار بلند آواز سے کہے لَا اِلٰهَ اِلَّا الله مرید بھی اسی طرح اسی آواز میں کہے،شیخ دوبارہ پھر کہے اورتکرار کرے ۔ اسی طرح تین بار تلقین ہوناچاہیے،شیخ دعا پڑھے مرید آمین کہے،پھر تین بار درود شریف پڑھے،اور شیخ کہےجس طرح ہم نے اپنے شیخ اور پیرسے پایا تھا تم کو دیا۔ مرید قبول کرے۔ اس کے بعدفاتحہ پڑھے، اور تکبیر کہہ کرخلوت کی طرف جائے وہاں مربع بیٹھ کر ذکر کی مشق کرے۔
For Contact Us
Go to Contact Page
or
Mail:contact@makhdoomashraf.com
Cal:+91-9415721972